Enn og aftur er trjám stolið úr trjásöfnum í Hellisskógi. Þetta er orðið árvisst vandamál. 

Að þessu sinni var stolið Virginíuhegg, Garðahlyn og Hrossakastaníu úr trjásafni innarlega í skóginum. Trén voru rifin upp og fjarlægð og ekki merki um að notuð hafi verið verkfæri. Trjánum var plantað þarna fyrir þremur árum, voru komin með góða rót og uxu vel.

Stuldurinn hefur átt sér stað um eða rétt fyrir helgina 10. – 11. júlí.

Fyrr í sumar voru tré rifin úr beði við Sundhöllina og í Miðbænum á Selfossi. 

Trjástuldur er einnig vandamál á skógræktarsvæðum, í þjóðskógum, almenningsgörðum og útivistarsvæðum víða um land.

Því miður eru sumir svo ómerkilegir að þeim finnst ekkert að því að stela sér trjám frá öðrum og planta í garðinn sinn. 

Ekki er ósennilegt að trjánum hafi verið plantað í garð eða við sumarbústað. Sumir telja að þarna séu að verki verktakar sem sjá um að fullgera lóðir fyrir almenning eða fyrirtæki.

Umfjöllun um trjástuldinn á Facebook siðu formanns Skógræktarfélags Selfoss hafði mikil áhrif. Í kjölfarið voru fréttaviðtöl bæði á RÚV og Sýn og víðar á samfélagsmiðlum.

Ef einhver hefur upplýsingar um afdrif trjánna þá endilega látið vita.

Meðfylgjandi eru myndir af trjánum fyrr í sumar og af svæðinu eftir stuldinn.

Vinnuflokkur frá Vinnuskóla Árborgar plantaði 540 rauðelriplöntum í reiti ofan við Helli 2. júlí.
Þar er talið hentug land fyrir rauðelriskóg. Land var tætt fyrir 4 árum og er núna hæfilega vel gróið fyrir plöntun.

Félaginu áskotnaðist talsvert magn af rauðelri, birki, sitkagreni og blágreni seinni hluta júní og ljóst að þetta er meira en virkir félagar í skógræktarfélaginu ráða við. Þess vegna var gripið til þess ráðs að fá unga og hressa unglinga verkið. Þau leystu plöntunina vel af hendi.
Líklega verður boðað til fleiri vinnuferða í Hellisskóg í sumar enda enn nóg eftir af plöntum.
Meðfylgjandi eru nokkrar myndir frá plöntuninni.

Félagar úr gönguhópi / Bruarvinnuflokki Ingva Rafns óku trjákurli í blautustu hluta Hellisbrúar framan við Réttarklett í Hellisskógi fimmtudaginn 4. júní. Kurlið fengu þeir hjá Skógræktarfélagi Árnesinga á Snæfoksstöðum.

Notast var við litla gröfu, tvö fjórhjól og þrjár kerrur við verkið enda gekk það fljótt og vel.
Áður hafði Brúarvinnuflokkurinn ekið kurli og möl í aðra hluta Hellisbrúar. Hellisbrúinn verður betri með hverju ári sem líður og veitir ekki af því gönguleiðin nýtur sívaxandi vinsælda hjá gestum skógarins.

Skógræktarfélag Selfoss þakkar Brúarvinnuflokknum kærlega fyrir vel unnin störf í Hellisskógi og Skógræktarfélagi Árnesinga fyrir kurlið.

Fyrsta vinnukvöld sumarsins var miðvikudaginn 3. júní. Plantað var 500 ársgömlum rauðelriplöntum (bakkaplöntur) í norðausturhluta Hellisskógar. Svæðið er blaut og litlar lækjarsitrur einkenna svæðið. Plantað var gisið í jaðra mesta votlendisins. Rauðelri er talið besta trjáplantan í slíkt land. Eldri rauðelriplantanir í blautt mýrlendi lofa góðu.

Tíu félagsmenn mættu í plöntunarvinnuna.
Eftir vinnuna var boðið uppá smá kvöldhressingu í brekkunni framan við Hellinn.

Stjórn Skógræktarfélags Selfoss hefur ákveðið að hafa fyrsta vinnukvöld ársins í Hellisskógi miðvikudaginn 3. júní kl. 20. Áætlað að verkið taki um eina klukkustund.

Mæting við Hellinn. Plantað verður rauðelri við eystri skíðabrautina í norðausturhorni Hellisskógar.

Boðið verður uppá veitingar í Hellinum að lokinni vinnu.

Góð reynsla er komin á rauðelri /svartelri sem plantað var sem smáplöntum sumrin 2023 og 2024. Lifun er góð og lítið um kal.
Rauðelrið virðist henta vel í mjög blautt land.

Aðalfundur Skógræktarfélags Selfoss var haldinn í Mörkinni, Grænumörk á síðasta vetrardag 22. apríl.
Auk hefðbundinna aðalfundastarfa var Hermann Ólafsson með kynningu á skipulagi á nýju skógræktarsvæði og tjaldstæði sunnan nýja Suðurlandsvegarins. Þar mun skógræktarfélagið koma að plöntun og gerð skjólbelta. Einng var kynnt aðkoman að nýju brúnni og undirgöngum við Stekkjarholt.
Frágangur og ásýnd meðfram Suðurlandsveginum og brúnni skipta miklu máli og þar reynir á skógræktarfélagið að vanda vel til verka.

Aðalfundur Skógræktarfélags Selfoss er miðvikudaginn 22. apríl 2026 kl 20:00 í Mörkinni (stóra salnum í Grænumörk – gengið inn að austanverðu).

Dagskrá:

• Venjuleg aðalfundarstörf.

• Hermann Ólafsson mun kynna viðbót við skógræktarsvæðið og aðlögun að nýja suðurlandsveginum.
  
  Allir eru velkomnir.

Bakgarðspísl Frískra Flóamanna fór fram í Hellisskógi á föstudaginn langa (3.apríl). Um er að ræða hlaupalegg sem er ein míla og höfðu hlauparar 15 mín til þess að klára hvern legg. Ræst er út í hvern legg á 15. mín fersti. Þetta er í fimmta sinn sem efnt er til þessa atburðar í Hellisskógi og í þetta sinn hlupu 65 manns á öllum aldri.

Byrjað var klukkan 8 um morguninn og hlaupið fram eftir degi. Átján byrjuðu strax kl. 8 en síðan voru nýir þátttakendur að bætast við allan morguninn. Þeir sem hlupu lengst fóru 50 km. Sex fóru þá vegalengd (2 konur og 4 karlar).
Aðstæður voru slæmar, hlaupaleiðin hál og eitthvað um polla á veginum, en veðrið var gott.

Frískir Flóamenn höfðu sem fyrr umsjón með hlaupinu. Íslenska gámafélagið lánaði kamarinn og Almar bakarí gaf kleinuhringi.

Pálmar Örn Guðmundsson er íþróttafræðingur, tónlistarmaður, knattspyrnuþjálfari, formaður Skógræktarfélgs Grindavíkur og margt fleira. Hann hefur undanfarin ár farið vítt og breytt um landið og tekið upp myndbönd um skóga. Hann birtir efnið á vef sínum Skógurinn – Forests in Iceland

Síðastliðið sumar kom hann í Hellisskóg og tók þar viðtal við Örn Óskarsson formann Skógræktarfélags Selfoss ásamt því að skoða skóginn. Formaðurinn gerði sitt besta nýkominn úr aðgerð á báðum augum og líklega tókst honum að gera efninu nokkuð góð skil enda vel kunnugur skóginum.

Þetta varð efni í tvo þætti hjá Pálmari.

Hellisskógur-fyrri þáttur

Hellisskógur-seinni þáttur

Björgvin Örn Eggertsson hlaut hvatningarverðlaun skógræktar 2026. Verðlaunaafhending fór fram í Garðyrkjuskólanum á Reykjum þann 21. mars á Alþjóðlegum degi skóga.

Björgvin hefur lengi verið stjórnarmaður í Skógræktarfélagi Selfoss og var formaður árin 1999-2000 og aftur 2006-2018.  Hann hefur líka verið í stjórn Skógræktarfélags Árnesinga og er núna varaformaður þar. Hann hefur séð um grisjun í Hellisskógi um árabil.

Björgvin er brautarstjóri Skógar og náttúru í Garðyrkjuskólanum ásamt því að vera forsvarsmaður  Endurmenntunar Græna geirans. Hann hefur annast fræðslu og verkefni sem snúast um umhirðu, plöntun, snyrtingu og skógarhögg.