Þann 15. apríl 1992 varð mesti gróðurbruni í 40 ára sögu Hellisskógar. Þá kveiktu unglingspiltar eld í sinu við Tjarnarhóla. Eldurinn fór hratt til suðvesturs undan norðaustan kalda. Svæðið sem brann voru nokkrir hektarar og taldist fullplantað. Nánast allur trjágróður eyðilagðist í eldinum. Eitthvað kom upp af rótum víðitrjáa en allt birki og fura á svæðinu eyddist.

Á þessum árum var mikið um sinuelda í sveitunum í kringum Selfoss  og eldur hafði ítrekað komist inn í skógræktargirðinguna að norðaustanverðu árin á undan. Plægð eldvarnarbelti meðfram Hellisgili dugðu til að stoppa þessa innrásarelda úr norðaustri svo þeir náði aldrei að dreifast neitt að ráði. Eldvarnarbeltin voru plægð árlega. Á svæðinu sem brann í apríl 1992 voru ekki slík belti og ekki kominn vegurinn upp að Helli, sem hefði stoppað eldinn.

Fyrir alla sjálfboðaliðana sem höfðu unnið að plöntun í Hellisskógi var þessi eyðilegging mikið áfall. Ekki var gefist upp og næstu ár eftir brunann var endurplantað í brunna svæðið, mest birki og víði. Núna 34 árum síðar er þarna gróskulegur birkiskógur.
Litlir gróðureldar hafa orðið í Hellisskógi á síðari árum, vegna fikts barna með eld í viðkvæmum gróðri. Slökkvilið hefur brugðist hratt við og slökkt eldana fljótt og vel en stundum hefur litlu mátt muna að mikið tjón hlytist af.

Miðvikudaginn 22. október var vinnudagur hjá Brúarvinnuflokki Ingva Rafns.
Þeir félagar óku viðarkuli í Hellisbrúna í Hellisskógi sem víða er blaut og óslétt.

Kurlið fékk Brúarvinnuflokkurinn hjá Skógræktarfélagi Árnesinga á Snæfoksstöðum. Notuð voru hin ýmsu verkfæri sem flokkurinn féll lánuð hjá velunnurum.
Mun meira þarf að kurli til að klára verkið. Hellisbrúin verður betri og betri við hvert sinn sem Brúarvinnuflokkurinn tekur til hendinni í Hellisskógi.

Skógræktarfélag Selfoss þakkar Brúarvinnuflokknum kærlega fyrir vel unnin störf í Hellisskógi og Skógræktarfélagi Árnesinga fyrir kurlið.

Nú eru HS-veitur að leggja nýjan rafstreng að nýrri Ölfusárbrú. Vegurinn meðfram Ölfusá í Helliskógi verður lokaður á dagvinnutíma (kl. 8:00-16:00) vikuna 13.-17. október næstkomandi.
Aðgengi verður að aðalbílastæði í skóginum á verktíma. Vert er að benda á að einhver truflun verður á umferð fram að lokun vegarins vegna undirbúningsframkvæmda.
Beðist er velvirðingar á þeim óþægindum sem þetta kann að valda.

Laugardaginn 4. október kl.11-14 var afmælishátíð í Hellisskógi. Veðrið var einstaklega gott og gestir í sólskinsskapi. Byrjað var á því að gróðursetja einn fjallareyni af afbrigðinu Dodong sem Skógræktarfélagið færði Hellisskógi að gjöf.

Á grasflötinni við aðal bílastæðið voru grillaðar pylsur ásamt meðlæti undir stjórn Snorra Sigurfinnssonar. Gengnir voru tveir hringir um skóginn undir leiðsögn Hermanns Ólafssonar og margir tóku þátt í ratleik sem Hlíf Böðvarsdóttir skipulagði. Hlaupahópurinn “Frískir Flóamenn” buðu uppá hlaupaferð um skóginn og Örn Óskarsson fræddi um fugla og tré.

Líklega komu um 100 manns á hátíðina sem þótti sérlega vel heppnuð og stjórn Skógræktarfélagsins var ánægð með hvernig til tókst.

Þann 1. október 1985 fyrir 40 árum var undirritaður samningur á milli Skógræktarfélags Selfoss og Selfossbæjar um skógræktarsvæði í landi Hellis norðan Ölfusár.
Síðan þá hefur verið unnið ötullega að skógrækt á svæðinu og nú er Hellisskógur orðin sannkölluð paradís fyrir þá sem unna hreyfingu og útivist í fallegu, skjólgóðu, skógivöxnu landi.

Í tilefni af þessum tímamótum verður efnt til útivistardags í skóginum laugardaginn 4. október n.k. kl. 11-14.
Þar verður boðið upp á ýmsa afþreyingu og útivist fyrir unga sem aldna, s.s. göngu um skóginn undir leiðsögn, skokk með hlaupahópnum Frískum flóamönnum, ratleik í skóginum ásamt fræðslu um fugla í og við Helliskóg.
Hátíðinni líkur svo með grilluðum pylsum, gosi, kaffi og kleinum.

Nánari umfjöllun er hér

Laugardaginn 20. september var hátíð á árbakkanum við Jóruklett á Selfossi. Þá útnefndi Skógræktarfélag Íslands sitkagrenitréð á Jórukletti tré ársins 2025.
Jónatan Garðarsson, formaður Skógræktarfélags Íslands, flutti opnunarávarp og fjórir félagar úr Lúðrasveit Selfoss blésu í lúðra.. Formaður Skógræktarfélags Árnesinga, Hreinn Óskarsson, flutti erindi ásamt bæjarstjóra Árborgar, Braga Bjarnasyni. Einnig ávarpaði Hafberg Þórisson í Lambhaga samkomuna en Lambhagi er styrktaraðili Trés ársins.

Hvernig sitkagreni komst í Jóruklett eða hver gróðursetti það þar virðist ráðgáta. Því gæti hafa verið plantað eða fræ fokið út í eyna. Það eina sem er fyrir víst er að þarna stendur það og dafnar með ágætum; eitt og sér. 

Skógfræðingarnir Björn Traustason og Aðalsteinn Sigurgeirsson gerðu mælingar á trénu og tóku sýni. Samkvæmt mælingum var tréð 9,7 metrar að hæð. Þvermál bolsins í brjósthæð (1,3 m) var 37,5 cm.

Teknir voru tveir borkjarnar af sitkagreninu, annar í brjósthæð og hinn í hnéhæð en hvorugur hitti inn í merg. Því var ekki hægt að segja með vissu hversu tréð var gamalt. Eftir á voru borkjarnarnir rannsakaðir af Ólafi Eggertssyni árhringjasérfræðingi. Líkt og áður segir þarf borkjarni að vera tekinn sem næst jörðu og liggja þráðbeint inn að merg til að hafa fullvissu um aldur trés. Það átti ekki við í þessu tilviki en af sýnum að dæma má reikna með að tréð sé frá árinu 1969 og sé því 57 ára gamalt. Líklega er það eldra miðað við stærð trésins á mynd frá 1974. Gæti verið frá því um 1960.

Á degi íslenskrar náttúru 16. september tók Skógræktarfélag Selfoss á móti alþjóðlegum hópi nemenda frá “International School of Zug and Luzern” í Sviss. Nemendurnir plöntuðu 50 plöntum af ýmsum tegundum meðfram göngustíg í ofanverðum Hellisskógi. Jafnframt fengu þau fræðslu um tré og skógrækt á Íslandi. Flottur hópur og skógræktarfélagið þakkar kærlega fyrir vinnuna.

Í sumar vann flokkur frá unglingavinnunni á Selfossi að stígagerð í Hellisskógi. Borin var mulnigur í stíg sem liggur inn í skóginn ofan við Hellisgil. Þar er fyrirhugað að setja upp fræðsluskilti um tré og skógrækt.
Hópurinn bar einnig möl í stíginn með ánni frá veiðistaði við stóru raflínuna og upp í Hellisgil.

Örn Óskarsson, formaður Skógræktarfélags Selfoss, leiddi göngu um Hellisskóg, kl. 17. þriðjudaginn 1. júlí.
Gangan var hluti af heilsubótar- og fræðslugöngum Garðyrkjufélags Íslands í tilefni af 140 ára afmæli þess í ár. Sautján manns mættu í gönguna.

Eins og venjulega vakti gróskan og tegundafjölbreytnin í skóginum athygli gestanna.
Hellisskógur á einnig afmæli á árinu, en 40 ár eru í haust frá því Skógræktarfélag Selfoss fékk úthlutað landi í Hellismýri undir skógrækt.
Þar sem áður var trjálaust land er nú fjörtíu árum seinna gróskulegur skógur.