Fimmtudaginn 15. maí kl. 20-21 verður borinn áburður að sitkagreni og öspum austan við Hellinn.
Mæting við Hellinn.
Áburður og verkfæri verða á staðnum en fólk má gjarnan koma með hentugar fötur undir áburð og munið eftir hlífðarvettlingum.
Létt og aðgengileg vinna fyrir alla aldurshópa.
Veitingar verða í Hellinum að lokinni vinnu.
Laufgun trjáa er núna um þremur til fjórum vikum fyrr á ferðinni en í meðalári. Á ferð um Hellisskóg 7. maí kom í ljós að flestir reyniviðir, nema alpareynir voru allaufgaðir. Flest asparkvæmi voru laufguð, nema t.d. kvæmið Brekkan. Flestar elritegundir eru komnar með smáblöð og margar birkiplöntur eru allaufgaðar og flestar komnar með smáblöð. Brum á greni, furum og hlynplöntum eru að opna sig en brun eru aðeins farin að þrútna á eik og gullregni.
Meira að segja lúpína og hófsóley eru farin að blómstra.
Á árunum kringum 1980 var laufgun trjáa metin hér á Selfossi. Þá kom í ljós að birki var komið með smáblöð um 10 júní, mánuði síðar en nú.
Nú vonum við heitt og innilega að ekki komi maíhret með roki og kulda, þá gæti gróður farið illa.
Myndir eru teknar í Hellisskógi 7. maí 2025.
Á aðalfundi Skógræktarfélags Selfoss 29. apríl var Höskuldur Tryggvason frá Vegagerðinni með erindi.
Hann fjallaði um stöðu framkvæmda við veg og brú og um framkvæmdaáætlun fyrir næstu mánuði.
Einnig minntist hann aðeins á frágang við veg og brúarenda Hellisskógarmeginn.
Hann taldi að aðgengi að útivistarsvæðinu næstu mánuði yrði óbreytt. Stígar frá aðalbílastæði verða áfram lokaðir en gott aðgengi eftir veginum með ánni út árið.
Það eru gleðitíðindi fyrir okkur skógræktarmenn og þá sem leggja leið sína í Hellisskóg. Fyrri áætlanir gerðu ráð fyrir lokunum á meðan á sprengivinnu stæði. Nú er hægt að hefja undirbúning fyrir sumarstörf í Hellisskógi.
Aðalfundur Skógræktarfélags Selfoss er þriðjudaginn 29. apríl 2025 kl 20:00 í Mörkinni (stóra salnum í Grænumörk).
Dagskrá:
Vegna framkvæmda við nýja Suðurlandsveginn í Hellisskógi hefur tveimur gönguleiðum frá aðal bílastæðinu verið lokað. Sett hafa verið upp lokunarskilti og leiðbeiningarskilti við stígana. Skógræktarfélagið hvetur gesti í skóginum til að virða þessar lokanir.
Enn er opið eftir veginum meðfram Ölfusá en sú leið mun einnig lokast síðar á árinu.
Unnið er að því að útbúa aðra leið fyrir bíla og gangandi inn í skóginn ofan við Stekkjarholt, en óljóst er hvenær sú leið verður opnuð.
Þann 20. febrúar 2025 voru tvö reynitré flutt úr brúarstæðinu við Ölfusá á nýjan vaxtarstað ofar í Hellisskógi. Þessi tré voru þau einu sem voru metin verðmæt af þeim sem eru í vegstæðinu. Önnur tré á svæðinu eru einkum ýmsar víðitegundir sem eru komnar á aldur og ekki ástæða til að bjarga.
Skógræktarfélagið hefur frá því byrjað var að vinna í Hellisskógi árið 1986 skilið eftir 100 m breitt bil í skóginum fyrir vegstæðið.
Nú styttist í að framkvæmdir við brúarendann og vegaframkvæmdir hefjist í Hellisskógi og því síðustu forvöð að bjarga trjám.
Trén voru flutt að “Rauða torginu” svokallaða norðan við Grímskletta og eiga vonandi eftir ða standa þar vel og lengi.
Guðmundur B Sigurðsson vann verkið vel og snyrtilega eins og honum er ávallt lagið. Myndirnar eru af flutningi stærra trésins sem er alpareynir.
Í dag 28. janúar 2025 var nóg af snjó í Hellisskógi. Tvær 1,2 km og 1,5 km langar skíðabrautir voru troðnar efst í skóginum, þar sem félagsmenn í Skógræktarfélaginum merktu fyrir leiðum síðastliðið haust.
Björgunarfélag Árborgar verður umsjónaraðili þessara gönguskíðabrauta og munu sjá um að troða og viðhalda þeim, þegar veður og snjóalög leyfa. Bárður Árnason hefur haft forgöngu um að útbúa þessar brautir í samvinnu við Skógræktarfélag Selfoss.
Aðkoma að skíðasvæðinu er frá Biskupstungnabraut. Þar er rúmgott bílastæði og gott aðgengi að efsta hluta Hellisskógar.
Skíðabrautirnar munu nýtast sem gönguleiðir á sumrin.
Með þerssum framkvæmdum opnast nýjar leiðir um ofanverðan Hellisskóg sem eiga eftir að nýtast gestum jafnt vetur sem sumar.
Hjónin og skógræktarfólkið Sigmundur Stefánsson og Ingileif Auðunsdóttir gengu nýtroðnar brautirnar og leist vel á.
Örn Óskarsson tók nokkrar myndir af þeim þegar þau prufukeyrðu leiðirnar.
Um miðjan janúar hækkaði hratt í Ölfisá og náði rennslið tæplega 1400 m3/ sek. Þetta er mesta flóð síðan í febrúar 2013. Flóðið er afleiðing hlýjinda, snjóbráðnunar og talsverðrar rigningar dagana á undan. Sem betur fer fylgdi þessu tölulega lítið ísrek.
Í Hellisskógi náði vatnið upp á veg og göngustíg með ánni. Tjón af völdum þessa virðist vera fremur lítið, en á eftir að koma betur í ljós þegar vatnsborð lækkar. Tré á árbakkanum virðast hafa sloppið vel.
Myndirnar eru teknar 16.-17. janúar 2025.
Þrjú stór sitkagrenitré úr Hellisskógi prýddu Árborg um jólin. Trén voru um 7-9 m há og voru sett upp í miðbæ Selfoss, á Eyrarbakka og það stærsta var á Stokkseyri.
Björgvin Örn valdi og felldi trén en starfsmenn Árborgar sáum um flutning úr skóginum og uppsetningu í bæjarfélögunum.
Fyrir suma getur verið snúið að finna rétta jólatréð í stofuna.
Normansþinur eða rauðgreni eru þá oft álitin fyrirmyndartrén. Þessar tegundir eru oftast innfluttar.
Í íslenskum skógum vex stafafura með ágætum. Ásamt því að vera ræktuð á Íslandi (gjaldeyrissparandi) er hún talin sameina kosti hins fullkomna jólatrés, þéttvaxin, litfögur, ilmar vel og er einstaklega barrheldin.
Grenitegundirnar halda barrinu verr og sumar mjög illa í stofuhita. Sitkagrenið er prýðis útitré en fellir barr á nokkrum dögum í stofuhita. Hvítgreni er enn verra, tapar barrinu hratt og lyktar þar að auki mjög illa (kattahlandslykt).
Best er að halda sig við stafafuruna.
Skógræktarfélag Selfoss er ekki með jólatré til sölu.
Á Snæfoksstöðum í Grímsnesi er Skógræktarfélag Árnesinga með nóg af stafafuru fyrir jólin, bæði hægt að sækja sjálf i skóginn eða kaupa fyrirframhöggin tré.
Sjá: https://www.facebook.com/snaefokstadir/?locale=is_IS
